Currículum

De formación autodidacta, iníciase no debuxo e a pintura ó lado do seu pai, o pintor Vázquez Doce. Ós dezaoito anos expón por primeira vez na Courña. Na súa primeira etapa alterna óleo e acuarela, expoñendo nas catro cidades galegas. En 1974 expón en Santiago de Compostela no Hostal dos Reis Católicos. En 1979 afíncase en Madrid por un período de dous anos e a galería de arte Bercowitsch faille unha exposición de acuarelas. Nesa etapa fórmase como escenógrafo ó lado do director e actor de teatro arxentino Santiago Doria e o dramaturgo Jaime Salón. É seleccionado para asistir a un curso de pintura sobre nu con modelo pola Facultade de Belas Artes de San Fernando, ó tempo que prepara unha exposición para a galería Torques de Santiago de Compostela, onde coñece ó pintor Laxeiro, que lle compra unha das obras alí expostas. En 1981 traslada a súa residencia a Ferrol, onde prepara a obra para a exposición na Institución Cultural El Brocense de Cáceres. En 1982 viaxa a Venezuela e é invitado a expoñer na sala de exposicións da Embaixada Española. Nese mesmo ano prepara as exposicións da Galería Arboreda de Ferrol e a galería Rúa Nova de Lugo. En 1983 a galería de arte Citania de Santiago de Compostela publícalle a carpeta ‘Cuatro Acuarelas’ con originais da súa autoría e textos de Ramón Otero Pedrayo e Salvador Lorenzana e poemas de Pero Meogo, Rosalía de Castro, Eduardo Blanco Amor, Álvaro Cunqueiro e Manuel Curros Enríquez. En 1984, a compañía de teatro Ítaca de Santiago de Compostela encárgalle realizar a escenografía da peza Eclipse Total de Christopher Hampton. Do 2 ó 12 de agosto dese mesmo ano, a Consellería de Cultura da Xunta de Galicia invítao a representar a Galicia no XIV Festival Interceltique de Lorient en Francia xunto con Lomarti, Xulio Maside, Morquecho e Ignacio Basallo.